Die Marktwertschaft unn die Kokosnuß
Teil II



Beim Aldi isch des deshalb so billisch, mit dene Kokosniß, unn dene Ferz, weil die immer soviel kaafen! Ma muß awwer ach bedenke, was do fer än Haufe Ärwed dähinnersteckt. Des muß ma sisch mol vorstelle, was so ä Kokosnuß alles erlebt, bis endlisch mol änner ä Blumevas aus´re macht!

* Zuerschd muß do jo mol änner sei, wu än Acker hot. Jetz derfschda des jo nät so vorstelle, wie bei uns. Weil, bei uns krieschd ma jo so än Acker vun de Gemä, meischdens vun de Ortsgemä, nät ganz so oft ach vun de Verbandsgemä. Ä paar Leit kaafen sisch ach än Acker bei Privatleit, awwer die werren dann jo ach meischdens bschisse. So. Des isch jo ä äfachi Sach. Des kann jo jeder, wu ä Bissl Geld hot. Odda ma nämd sisch halt än Kredit uff. Unn des widderum isch jo ganz gut fer unser Wertschaft. Uhne Kredite deden jo die Banke nät iwwerlewe. Unn dann mißde ma immer unser ganzes Geld dähäm hawwe. Do deden jo die Eibrescher wie Pilz aussem Bode schieße. Dann wärn alle Gfängnisse iwwerfillt, unn de Staat het fer nix Anres mä Geld iwrisch. Awwer zurick zum Thema.

* In Afrika (odda Südamerika, odda wu die Koksniß als herkummen), do kannsch da jo nät äfach än Acker kaafe. Also kinne duschd vielleischd schun, awwer die Leit do unne hän jo ach kä Geld. Unn än Kredit krischen die jo ach nät. Also gehn Die Leit do in de Urwald, nämmen ä Beilsche mit, unn ä paar Streichhelzle unn roden sisch do so ä Schdigg Land. Was jo widderum gar nät gut isch, fer´s Wetter. Weil, weschem Ozonloch unn so. Des brauch isch jo nät weider zu erkläre, des kennt jo heit ach jedes Kind. Isch jo klar, hängt jo ach mit de Kokosniß zamme. Schlußfolscherung: Wer Kokosniß kennt, der kennt ach´s Ozonloch.

* Dann lossen´se des ä Weil lische, unn planzen dann ä paar Kokosnußpalme druff. Dann mißen se ä paar Johr warde, unn dann kummen die erschde Kokosniß.



Alla, bis dann,
inger@scram.de




zurück